ЯК СПЛАНАВАЦЬ ПАЕЗДКУ

Тут вы можаце даведацца, якія крокі вам трэба зрабіць, каб максімальна паспяхова спланаваць сваю паездку.

Распланаваўшы ўсе мерапрыемствы і іншую дзейнасць, разлічыце ўсе выдаткі на паездку. Памятайце, што праграма MOST+ пакрывае наступныя выдаткі:

● Выдаткі на міжнародны праезд (квіткі на аўтобус/цягнік/самалёт набываюць супрацоўнікі праграмы пасля ўзгаднення з атрымальнікам гранта);
● Пераезды паміж гарадамі ў краіне/краінах прызначэння (кампенсуюцца толькі паездкі эканомкласам);
● Выдаткі на знаходжанне або "сутачныя", што могуць быць кампенсаваныя падчас паездкі, якая ажыццяўляецца па-за межамі звычайнага месца жыхарства. Сутачныя - гэта максімальная фіксаваная стаўка, якая пакрывае выдаткі на пражыванне. Сюды ўваходзяць пражыванне, харчаванне, паездкі на гарадскім або прыгарадным транспарце, у тым ліку праезд у аэрапорт і назад. Такім чынам, кошт праезду ў таксі пакрываецца сутачнымі. Велічыня сутачных рэгулюецца нормамі Еўрапейскага Саюза ў залежнасці ад краіны;
● Правілы ЕС для разліку сутачных: яны выплачваюцца ў залежнасці ад колькасці гадзін, праведзеных у паездцы. Сутачныя могуць выплачвацца толькі цалкам або напалову (іншыя долі немагчымыя). Поўныя сутачныя выплачваюцца за кожныя 24 гадзіны, праведзеныя ў паездцы. Палова сутачных выплачваецца ў выпадку знаходжання ў паездцы больш за 12 гадзін, але менш за 24 гадзіны. Сутачныя не выплачваюцца за паездку карацейшую за 12 гадзін. Час у дарозе трэба разглядаць як частку паездкі. Магчыма запытваць сутачныя, калі паездка ў краіну мабільнасці патрабуе начлегу ў трэцяй краіне, у якую трэба паехаць, каб дабрацца да краіны прызначэння;
● Рэгістрацыйныя ўзносы (акрыдытацыі на канферэнцыі, форумы, кірмашы, трэнінгі);
● Візавы збор;
● Медыцынскую страхоўку (патрабуецца, калі ўдзельнік яшчэ не застрахаваны);
● Іншыя выдаткі, непасрэдна звязаныя з рэалізацыяй паездкі (аплата дадатковага багажу для музычнай прылады, аплата промапрадукцыі і да т.п.);
● Дадатковыя выдаткі, звязаныя з асаблівымі патрэбамі;
● Паездка ў Маскву па візу для стажыроўкі можа лічыцца асаблівай патрэбай, калі найбліжэйшы візавы аддзел краіны прызначэння, які выдае візы беларусам, знаходзіцца менавіта там (фінансуецца да 150 еўра на чалавека). Пералік такіх дадатковых выдаткаў з іх абгрунтаваннем мусіць быць указаны ў бюджэце стажыроўкі.
● Для паездкі даўжэйшай за 14 дзён па адной краіне, сутачныя будуць выплачвацца па наступнай схеме: сума сутачных у ЕС х 0,66 (зыходзячы з таго, што ўдзельнікі доўгатэрміновых стажыровак змогуць арганізаваць для сябе эканомнае пражыванне);
● У выпадку паездкі па некалькіх краінах, сутачныя залежаць ад колькасці начэй, праведзеных за адно наведванне у кожнай краіне (прыклад: Вольга едзе на мерапрыемствы ў Францыю (5 сутачных) і Польшчу (10 сутачных), плюс яна правядзе адну ноч (20 гадзін) у Вільні - праз Літву яна ўязжджае ў ЕС. Кошт знаходжання Вольгі разлічваецца наступным чынам: 163х1/2 = 81,50 EUR за знаходжанне ў Літве, плюс 268х5 = 1340 EUR за знаходжанне ў Францыі, плюс 170х10 = 1700 EUR за знаходжанне ў Польшчы. А агульны кошт сутачных для паездкі Вольгі складае 3121,5 EUR).

Важная інфармацыя: бенефіцыяры праграмы самі адказваюць за аплату падаткаў, звязаных з атрыманнем гранта. Праграма MOST+ не дае кансультацый па пытаннях, звязаных з падаткаабкладаннем.

Праграма MOST+ НЕ ПАКРЫВАЕ наступныя выдаткі:

● Выдаткі, не ўказаныя ў прыкладзеным да заяўкі бюджэце паездкі;
● Выдаткі, якія не маюць прамой сувязі з паездкай (падарункі, арганізацыя вольнага часу і да т.п.);
● Выдаткі, ужо пакрытыя іншымі грантамі і праграмамі;
● Выдаткі, панесеныя да падпісання пагаднення аб прадастаўленні гранта;
● Выдаткі на паездкі, якія ўжо адбыліся.